പ്ലസ‌് വൺ: 20 ശതമാനം സീറ്റ‌് വർധിപ്പിച്ചു
കുട്ടികൾ കുറവുള്ള ബാച്ചുകൾ സ‌്കൂൾ മാറ്റി നൽകാൻ റിപ്പോർട്ട‌് തേടി
തിരുവനന്തപുരം:
സംസ്ഥാനത്തെ സർക്കാർ, എയ്ഡഡ് ഹയർ സെക്കൻഡറി സ‌്കൂളുകളിൽ ഒന്നാം വർഷ പ്രവേശനത്തിന‌് 20 ശതമാനം മാർജിൻ സീറ്റ‌് വർധിപ്പിച്ച‌് സർക്കാർ ഉത്തരവിറക്കി. ഇത‌് പ്രകാരം സംസ്ഥാനത്തെ മുഴുവൻ സ‌്കൂളുകളിലെയും എല്ലാ ബാച്ചുകളിലും 10 വിദ്യാർഥികളെ വീതം അധികമായി പ്രവേശിപ്പിക്കാൻ കഴിയും. അൺ എയ്ഡഡ് സ‌്കൂളുകളിൽ സീറ്റ‌് വർധനയില്ല. നിലവിൽ 360000 സീറ്റുകൾ ഹയർസെക്കൻഡറികളിലാകെയുണ്ട‌്. 20 ശതമാനം സീറ്റുകൾ വർധിപ്പിച്ചപ്പോൾ 62000 കുട്ടികളെ അധികമായി പ്രവേശിപ്പിക്കാനാകും. ആദ്യ അലോട്ടുമെന്റിന്റെ ഭാഗമായി തന്നെ സീറ്റു വർധനയ‌്ക്ക‌് പൊതുവിദ്യാഭ്യാസ മന്ത്രി പ്രൊഫ. സി രവീന്ദ്രനാഥ‌് ശ്രമിച്ചിരു‌ന്നെങ്കിലും ലോക‌്സഭാ തെരഞ്ഞെടുപ്പ‌് പെരുമാറ്റചട്ടം തടസമായി. തുടർന്നാണ‌് നിയന്ത്രണം നീക്കിയതിന‌് പിന്നാലെ സീറ്റ‌് വർധിപ്പിച്ച‌് ഉത്തരവിട്ടത‌്. രണ്ടാം അലോട്ടുമെന്റ‌ിൽ വർധിപ്പിച്ച സീറ്റ‌് ഉൾപ്പെടുത്തില്ല. അതിനുശേഷം സ‌്കൂൾ കോമ്പിനേഷൻ ട്രാൻസ‌്ഫറിലും സപ്ലിമെന്ററികളിലും അധിക സീറ്റ‌് ഉൾപ്പെടുത്തും.
ആവശ്യത്തിന‌് വിദ്യാർഥികളില്ലാത്തതിനെ തുടർന്ന‌് ഭൂരിഭാഗം സീറ്റുകളും ഒഴിഞ്ഞുകിടക്കുന്ന ഹയർ സെക്കൻഡറി ബാച്ചുകൾ സ‌്കൂൾ മാറ്റി നൽകുന്നതിനുള്ള ശുപാർശ സമർപ്പിക്കാൻ ഹയർ സെക്കൻഡറി ഡയറക്ടറെ സർക്കാർ ചുമതലപ്പെടുത്തി. കഴിഞ്ഞ വർഷം ഇത്തരത്തിൽ എട്ടു ബാച്ചുകൾ കുട്ടികൾ കൂടതലുള്ള ജില്ലകളിലേക്ക‌് മാറ്റി നൽകിയിരുന്നു. ഈ വർഷം കുട്ടികൾ കുറവുള്ള ബാച്ചുകൾ കണ്ടെത്തുന്നതിനും അവ ഏത‌് ജില്ലകളിലെ ഏതെല്ലാം സ‌്കൂളുകളിലേക്ക‌് മാറ്റി നൽകണമെന്നതും കണ്ടെത്തുന്നതിനുള്ള നടപടികൾ ആരംഭിച്ചതായി ഹയർ സെക്കൻഡറി ജോയിന്റ‌് ഡയറക്ടർ ഡോ. പി പി പ്രകാശൻ അറിയിച്ചു. ഇതു സംബന്ധിച്ച‌് ശുപാർശ അതിവേഗം സമർപ്പിക്കുമെന്നും അദ്ദേഹം പറഞ്ഞു.
