ഫോക്ക്‌ലോർ ഫെസ്റ്റിൽ സ്വാതന്ത്ര്യ വാർഷികം ആഘോഷമുഖരിതമാക്കി 75 കവിതകൾ:
സ്വപ്‌നത്തിനുമപ്പുറത്തെ വേറിട്ട അനുഭവമെന്ന് പ്രൊഫ. മ്യൂസ് മേരി ജോർജ്
ഫോക്ക്‌ലോർ ഫെസ്റ്റിൽ സ്വാതന്ത്ര്യ വാർഷികം ആഘോഷമുഖരിതമാക്കി 75 കവിതകൾ:
സ്വപ്‌നത്തിനുമപ്പുറത്തെ വേറിട്ട അനുഭവമെന്ന് പ്രൊഫ. മ്യൂസ് മേരി ജോർജ്
സ്വപ്‌നത്തിൽപ്പോലും വന്നിട്ടില്ലാത്ത തികച്ചും വേറിട്ടൊരു അനുഭവമാണ് ഫോക്ക്‌ലോർ ഫെസ്റ്റും അതിന്റെ ഭാഗമായ കവികളുടെ കൂട്ടായ്‌മയും സ്വാതന്ത്ര്യ വാർഷിക സൂചകമായി 75 കവിതകളുടെ ആലാപനവുമെന്ന് എഴുത്തുകാരി എഴുത്തുകാരി പ്രൊഫ. മ്യൂസ് മേരി ജോർജ്. സ്വാതന്ത്ര്യപ്രാപ്‌തിയുടെ വാർഷികം കവിത ചൊല്ലിയും പടം വരച്ചും സിനിമ കണ്ടും സമൂഹത്തെയാകെ ചേർത്തുനിർത്തിയും ആഘോഷിക്കുകയെന്നത് വളരെ മനോഹരമാണ്. വൈപ്പിൻ ഫോക്ക്‌ലോർ ഫെസ്റ്റിന്റെ ഭാഗമായി സ്വാതന്ത്ര്യത്തിന്റെ എഴുപത്തിയഞ്ചാം വാർഷികാഘോഷത്തിന്റെ പ്രതീകമായി മുപ്പതോളം ഇന്ത്യൻ, വിദേശ ഭാഷകളിൽ ഭാരതാംബയെ വന്ദനം ചെയ്യുന്ന 75 കവിതകൾ ഒറ്റദിവസം നാലു സെഷനുകളിലായി ആലപിക്കുന്ന 'ഭാരതവന്ദനം' വിവിധഭാഷ കവിയരങ്ങ് ഞാറക്കൽ മാഞ്ഞൂരാൻ ഹാളിൽ ഉദ്ഘാടനം ചെയ്യുകയായിരുന്നു എഴുത്തുകാരി.
വൈവിധ്യങ്ങളുടെയും വ്യത്യസ്‌തതകളുടെയും ഭൂമികയായ ഇന്ത്യ ഉപഭൂഖണ്ഡം ഒരു വിശ്വാസമാണ്. അല്ലാതെ കേവല രാഷ്ട്രീയഭൂപടം മാത്രമല്ല. അതിന്റെ സാംസ്‌കാരികമായ ആന്തരീക ഭൂപടത്തെയും ഉൾക്കൊള്ളുമ്പോഴാണ് സ്വാതന്ത്ര്യത്തിന്റെ പുതിയകാല അനുഭവങ്ങളുടെ ആവിഷ്‌കാരം ഉണ്ടാകുന്നത്. ബഹുസ്വരതയിൽ വിശ്വസിക്കുന്ന മനുഷ്യജീവിതത്തിന്റെ നന്മയിലാണ് ഇന്ത്യയുടെ സ്വാതന്ത്ര്യത്തിന്റെ അന്തഃസത്ത. ബഹുസ്വരതയാണ് ഇന്ത്യയുടെ കരുത്തെന്നും പ്രൊഫസർ മ്യൂസ് മേരി ജോർജ് പറഞ്ഞു.
ഫെസ്റ്റുമായി സഹകരിച്ച് ഗ്രേറ്റർ കൊച്ചി കൾച്ചറൽ ഫോറം സംഘടിപ്പിച്ച പരിപാടിയിൽ അധ്യക്ഷത വഹിച്ചു. കവി എസ് ജോസഫ് മുഖ്യപ്രഭാഷണം നടത്തി. കവിത രാജ്യം പോലെയാണെന്ന് എസ് ജോസഫ് പറഞ്ഞു. വികാരങ്ങളിലും വിചാരങ്ങളിലുമുള്ള വൈവിധ്യവും ബഹുസ്വരതയുമാണ് കവിതകളിൽ ആവിഷ്‌കരിക്കുന്നത്. സംഗീതമുള്ള സമൂഹത്തിനു മാത്രമേ സമാധാനപൂർണമായ ജീവിതമുള്ളൂ. കവികൾ സംസാരിക്കുന്നത് സംഗീതാത്മകമായ ഒരൊറ്റഭാഷയിലൂടെയാണ്. മാനവികതയുടെയും ഒരുമിപ്പിന്റെയും ഭാഷ. ആ ഭാഷ സ്വാംശീകരിച്ച കവിതകൾ ഹൃദയങ്ങളെ ഒന്നാക്കിമാറ്റുന്നുവെന്നും എസ് ജോസഫ് പറഞ്ഞു.
സ്‌കൂൾമുറ്റം വ്യാസ് കോളേജ് ഡയറക്‌ടർ ഫാ. ഫെലിക്‌സ് ചക്കാലക്കൽ, പറവൂർ എസ്എൻവി സ്‌കൂൾ മാനേജർ ഹരി വിജയൻ, ഗ്രേറ്റർ കൊച്ചി കൾച്ചറൽ ഫോറം പ്രസിഡന്റ് ഷൈൻ ആന്റണി, ജനറൽ സെക്രട്ടറി അഡ്വ. കെ എസ് ജിജോ, സ്പോർട്ട്സ് ഫോറം പ്രസിഡന്റ് ഡോ സജീവ് ജോസ്, ഭാരതവന്ദനം കൺവീനർമാരായ ശരത് എസ് ബാവക്കാട്ട്, ജിബി ദീപക്, ഫെസ്റ്റ് കോ ഓർഡിനേറ്റർ ബോണി തോമസ്, ജനറൽ കൺവീനർ എ പി പ്രനിൽ, ഫ്രാഗ് പ്രസിഡന്റ് അഡ്വ. എ ബി സാബു എന്നിവർ എന്നിവർ പങ്കെടുത്തു.
കവിസംഗമത്തിൽ രാജ്യത്ത് നിന്നെമ്പാടുമായി കേന്ദ്രസാഹിത്യ അക്കാദമി അവാർഡ് ജേതാവ് ആർ എൽ ഭാസ്‌കർ, അയ്‌മനം രവീന്ദ്രൻ, പ്രകാശ് ചെന്തളം, പറവൂർ ബാബു, നിറ്റു ആൻ തോമസ്, തുളസിദാസ്‌, ദീപു RS ചടയമംഗലം എന്നിവരുൾപ്പെടെ 90പേർ പങ്കെടുത്തു. മലയാളത്തിലെ വിവിധ താവഴികളിലെ കവിതകൾക്ക് പുറമെ ഹിന്ദി, ഇംഗ്ലീഷ്, ചൈനീസ്, ജർമ്മൻ,ഫ്രഞ്ച്, അറബിക്, റാവൂല, തമിഴ്, അസമീസ്, കന്നഡ, ഒഡീസി, കൊങ്കണി, തുളു, റാവുല, മറാത്തി, ഗുജറാത്തി, സംസ്‌കൃതം, ഛത്തീസ്ഗഡ്, ഹിമാചൽ, ബെംഗാളി തുടങ്ങി മുപ്പത് ഭാഷകളിൽ നിന്നുള്ള കവിതകളും ആലപിച്ചു.
