വഴി തെറ്റിച്ച് രാമനാട്ടുകരയിലെ വഴികാട്ടി
രാമനാട്ടുകര :
നഗരത്തിൽ വാഹനയാത്രക്കാർക്ക് ആശയക്കുഴപ്പം സൃഷ്ടിച്ച് ദിശാസൂചക ബോർഡ്. പഴയ ദേശീയ പാതയിൽ രാമനാട്ടുകര ബസ് സ്റ്റാന്റിലേക്ക് പ്രവേശിക്കുന്നതിനു തൊട്ടു മുമ്പായി ഇടതു ഭാഗത്താണ് ആശയക്കുഴപ്പം സൃഷ്ടിക്കുന്ന വിധത്തിൽ ബോർഡ് സ്ഥാപിച്ചിട്ടുള്ളത്. മലപ്പുറം, കൊച്ചി എന്നിവിടങ്ങളിലേക്ക് ബോഡിൽ ദിശ കാണിക്കുന്ന ഭാഗത്തേക്ക്‌ പോയാൽ റോഡ് മാറി വട്ടം കറങ്ങേണ്ട അവസ്ഥയാണ്. മൂന്ന് വർഷത്തോളമായി ഈ ബോർഡ് വാഹനങ്ങളെ വട്ടം ചുറ്റിക്കുന്നു. ഈ ബോർഡ് താണ്ടി ഇരുന്നൂറോളം മീറ്ററിൽ എയർ പോട്ട്റോഡും യൂനിവേഴ്സിറ്റി റോഡും രണ്ടായി തുടങ്ങുന്ന കവലയിൽ സദാ വാഹനങ്ങൾ ദിശയറിയാതെ നട്ടം തിരിയുന്നത് പതിവായപ്പോൾ ഓട്ടോ തൊഴിലാളി എസ് ടി യു യൂനിയൻ രണ്ട് വർഷം മുമ്പ് പാരഡൈസ് ഹോട്ടലിന് മുമ്പിൽ വഴി കാട്ടി ബോർഡ് സ്ഥാപിച്ചിരുന്നു. നഗരസൗന്ദര്യവൽക്കരണത്തിൽ അത് പിഴുതു മാറ്റപ്പെട്ടു. രണ്ടു ജില്ലകളിലേക്കുളള പ്രധാന പാതകളെ വേർ തിരിക്കുന്ന ഇവിടെ അയൽസംസ്ഥാനങ്ങളിൽ നിന്ന് വരുന്നവരും അയ്യപ്പഭക്തരും സ്ഥിരമായി വഴിതെറ്റാറുണ്ട്. ചരക്ക് ലോറികൾ ദിശ മാറി തിരിച്ച് പോവാൻ പാട് പെടുന്നതും ഇതു മൂലം ഗതാഗതത്തിരക്കുണ്ടാകുന്നതും പതിവാണ്. വഴി തെറ്റിക്കുന്ന വഴികാട്ടികളിലെ അപാകതകൾ പരിഹരിക്കണമെന്നും നഗരത്തിൽ എല്ലാ വാഹനങ്ങൾക്കും കാണത്തക്ക രീതിയിലുള വലിയ ദിശാ ബോർഡ് സ്ഥാപിക്കണമെന്നുമാണ് ഡ്രൈവർമാരുടെ ആവശ്യം
