ആതുര സേവന രംഗത്ത് അര നൂറ്റാണ്ടിലേറെയായി കുന്ദമംഗലത്തെ ജനകീയ ഡോക്ടര്‍ എന്‍. വിജയൻ
തലമുറകളായി കുന്ദമംഗലത്തുകാരുടെ കുടുംബ ഡോക്ടറാണ് ഇദ്ദേഹം. ഡോക്ടറെ കണ്ടാല്‍ രോഗം ഭേദമാകുമെന്ന വിശ്വാസമാണ് നാട്ടുകാര്‍ക്ക് ഇദ്ദേഹം ഏറ്റവും പ്രിയപ്പെട്ടതാക്കുന്നത്. 1967ല്‍ വയനാട് അമ്ബലവയല്‍ സര്‍ക്കാര്‍ ഡിസ്‌പെന്‍സറിയില്‍ അസി. സര്‍ജന്‍ ആയാണ് ഔദ്യോഗിക ജീവിതം ആരംഭിക്കുന്നത്. സ്‌പെഷലിസ്റ്റ് ഡോക്ടര്‍മാര്‍ കുറവായതിനാല്‍ അക്കാലത്ത് ഒരേസമയം ഗൈനക്കോളജിസ്റ്റ് ആയും ജനറല്‍ ഫിസിഷ്യനായും പ്രവര്‍ത്തിച്ചിട്ടുണ്ട്. 2016ല്‍ ഇന്ത്യന്‍ മെഡിക്കല്‍ അസോസിയേഷന്‍ കോളജ് ഓഫ് ജനറല്‍ പ്രാക്ടിഷനേഴ്‌സ് കോഴിക്കോട് ചാപ്റ്ററിന്റെ ഫാമിലി പ്രാക്ടിസ് റീജനല്‍ അംഗീകാരം ലഭിച്ചു.
ഡോക്ടേഴ്സ് ദിനത്തില്‍ പതിറ്റാണ്ടുകളായി കുന്ദമംഗലത്ത് ആതുര സേവന രംഗത്ത് നിറസാന്നിധ്യമായ ഡോ. വിജയന്‍ കേരള വ്യാപാരി വ്യവസായി ഏകോപന സമിതി കുന്ദമംഗലം യൂനിറ്റിന്റെ ആഭിമുഖ്യത്തില്‍ ആദരിച്ചു. വ്യാപാരി വ്യവസായി ഏകോപന സമിതി ജില്ല സെക്രട്ടറി പി.കെ. ബാപ്പു ഹാജി ഡോക്ടറെ പൊന്നാട അണിയിച്ചു. യൂനിറ്റ് പ്രസിഡന്റ് എം. ബാബുമോന്‍ അധ്യക്ഷത വഹിച്ചു. എന്‍. വിനോദ് കുമാര്‍, ടി.വി. ഹാരിസ്, ഒ.പി. അസ്സന്‍ കോയ, എം.പി. മൂസ, സുനില്‍ കണ്ണോറ, സജീവ് കിഴക്കയില്‍, ടി.സി. സുമോദ്, എം.ആര്‍. നിമ്മി, കമലം, കെ.പി. അബ്ദുള്‍ നാസര്‍, എം.കെ. റഫീഖ്, ടി. ശശീന്ദ്രന്‍, ഗഫൂര്‍ എന്നിവര്‍ പങ്കെടുത്തു. പി. ജയശങ്കര്‍ സ്വാഗതം പറഞ്ഞു.
