കൂട്ടിൽ കയറിയ പെരുമ്പാമ്പ് കോഴികളെ കൊന്നു
മാവൂർ: കൂട്ടിൽ കയറിയ
പെരുമ്പാമ്പ് കോഴികളെ കൊന്നു. ചെറൂപ്പ കുറ്റിക്കടവ് തേവർമണ്ണിൽ മുഹമ്മദിന്റെ വീട്ടിലെ കോഴിക്കൂട്ടിൽ കയറിയാണ് പെരുമ്പാമ്പ് കോഴികളെ കൊന്നത്. ശനിയാഴ്ച പുലർച്ചെ നാലരയോടെ കോഴികളുടെ ബഹളം കേട്ട് വീട്ടുകാർ വന്നപ്പോഴാണ് സംഭവം. കൂട്ടിലുണ്ടായിരുന്ന മൂന്ന് കോഴികളിൽ രണ്ടെണ്ണത്തെ പെരുമ്പാമ്പ് അകത്താക്കിയിരുന്നു. ശേഷിക്കുന്നതിനെ കൊല്ലുകയും ചെയ്തു. വിഴൂങ്ങിയ കോഴികളെ ആളുകളെത്തിയതോടെ പിന്നീട് പുറന്തള്ളുകയും ചെയ്തു. വിവരമറിയിച്ചതനുസരിച്ച് താമരശ്ശേരി റെയ്ഞ്ച് ഓഫീസിലെ താത്ക്കാലിക വാച്ചർ കബീർ സ്ഥലത്തെത്തി പിടിച്ചുകൊണ്ടുപോയി. ചെറുപുഴയുടെ തീരത്തോട് ചേർന്ന വീട്ടിലാണ് സംഭവം നടന്നത്.
